Обратная связь Адава лэнай мэ исомэс кэ Македония пэ практика дэ романи организация «Ромаверзитас».
Адая организация кэрэла буты романэ студентэнца: дэла лэнгэ ловэ (стипендия) тэ плэскирэн пал институто. Дэ офисо адалэ организациятэ исы компьютеры ваше студентэндэ, савэ можинэн тэ явэн дэ любо времё, кэды офисо откэрдо, и тэ кэрэн буты палэ далэ компьютеры, тэ рэсэн дэ интернето. Дэ интернето организация скэрдя форумо ваше студентэндэ, кай студенты можинэн тэ уджинэн сарэ нэвипэна пал романэ организации, пал саро нэво, со кэрэлапэ ромэнца и ваше ромэндэ кэ Македония, пал дова, со гадже и романэ журналисты чинэна дэ газеты палэ ромэндэ. Дэ форумо можинэна тэ уджинэн, савэ исы конкурсы и вавир возможности ваше романэ чавэндэ и чаендэ, кон сыклёла. Кажно студенто можинэл тэ пхэнэл пэскиро лав и тэ дэл савида информация, сави ёв камэл тэ пхэнэл сарэнгэ студентэнгэ. Кэ «Ромаверзитас» исы библиотека ваше романэ студентэндэ.
Дая организация пролыджала семинары и тренинги ваше студентэндэ, собы тэ авэл лэнгэ пофэдыр тэ сыклён. Кэ «Ромаверзитас» исы программа, сави кхарэлапэ «Менторство». Пири дая программа романэ студенты можинэна тэ маинэн учителёс, саво вэла тэ поможинэл лэнгэ тэ сыклёс дэ институто, тэ объяснинэл саро, со лэнгэ пхаро дэлапэ и со ёнэ на галена, тэ ракирэл студентэнгэ, сыр тэ скэрэс пэскири карьера.
Мангэ исыс пхаро тэ кэрав буты дэ дая организация, пал дава, со мэ на джинав македонско чиб, а сарэ лыла кэрэнапэ пэ дая чиб. Нэ сарэ чавэ и чая, кон кэрэла удой буты, мангэ поможиндэ и объясниндэ саро пэ романэс и англиканэс. Македонска рома — лаче мануша. Думинав, со треби мангэ тэ роспхэнав сыр дживэна рома кэ Македония. Ромэн кэ Македония бут. Исы лэндэ даже пэскиро штэто дэ форо, кай дживэна екх рома. Адава исы кэ столица македониякири — Скопье, кхарэлапэ дава штэто — Шуто Оризари, нэ сарэ кхарэна лэс Шутка. Дэ Шутка исы романо тарго, карик рома вавирэ штэтэндэр и гадже явэна тэ скинэнпэ, пал дава со пэ дава тарго саро можинэн тэ кинэн нанэ дрогэс.
Романи чиб кэ македонска рома набут отличается амарьятэр, нэ мэ думинав, со ёнэ ракирэна сыр ловари. Ямэ ракираса «гожо», а ёнэ «шужи»; амэ ракираса «пшал», ёнэ — «прал»; ямэ пучаса «Сыр ту?», а ёнэ — «Сар сиян?». Мангэ сыс пхарэс тэ присыклёвав кэ лэнгиро ракирибэ, нэ мэ сыгэс ятём тэ галёвав саро и тэ ракирав пири лэнгиро диалекто.
Македония сы православно пхув, бут гадже-македонцы — христиане. Бут рома кэ Македония мусульмане, нэ дякэ жэ исы и православна, нэ сарэса набут. Кэ Македония исы бут албанцы, пал дава со Македония пашты паше Албания, а Албания сы мусульманско пхув. Дэ 1453 бэрш дживдя султано Сулеймано Великолепно и ёв скэрдя «Законо палэ ромэндэ», кай пхэндя со рома, кон сы христиане, треби тэ плэскирэн лэскэ налого бутыр, а рома-мусульмане потыкнэдыр. Пал дава бут рома прилынэ мусульманско патябэ.
Бьява кэ македонска Рома набут отличаются амарэ бьявэндэ. Нэ музыка и идя бут разно. Лэнгири музыка бут похожо пэ арабско. И кхэлэна ёнэ на сыр ямэ, ёнэ лэнапэ пал васта и кхэлэна гэрэнца, пиричховэна лэн штэто штэтостэр. Нэ дава кхэлыбэ ваш мангэ сыс пхаровато.
Урьенапэ ёнэ пэ бьяв традициональнэс. Пэ муй бори (невеста) треби тэ човэл «япешмаци», ада дасывэ сунакунэ монетки. Бурьякири идя пэ бьяв кхарэлапэ «демше». Ада кофточка, шаровары и савида накидка гожо, высуды сунакунэ тхавэнца. (Дыкх пэ картинка). Демше урьена и чая, кон нагара выгия палэ ром и ромня дэ бэрша. Тэрни бори дэ семья кажно дывэс треби тэ явэл гожо и шукар урявды. Бьяв сначала начинается пэ улица паше борьякиро кхэр, паше кхэр тэрдо скаминд, пэ скаминд бравинта, пиво, паня, нэ лэндэ на чховэнапэ хабна. Потом «джямутро»(дякэ кхарэлапэ женихо) пэскирэ семьяса и родоса явэла кэ бори. Кэды женихо джала, а джана ёнэ музыкаса, пибнэнца, подаркэнца, бори треби тэ явэл дэ кхэр. А лакиро родо кхэлэла паше кхэр. Потом женихо и бори кхэлэна кэтанэ пэскирэ семьенца и сарэ джана дэ ресторано. Нэ а удой саро сыр ямэндэ.
Бьявэса македонска Рома кхарэна и «сунэт». Сунэт — ада мусульманско традиция. Амэ джинас дая традиция сыр обрезание. Тыкнэ чаворэс урьена сыр султанос (Дыкх пэ фотография). Сунэт рома кхэлэна сыр бьяв, пал дава дякэ лэс акхарэна. Нэ исы бари проблема кэ Македония. Бут романэ тэкнэ чаворэ мангэна пэ улицы. Дэвэсэ и раты ёнэ ходинэна пири центро форо и мангэна ловэ, кэ прохожа мануша, кэ мануша, кон бэшто дэ кафэ. Екх моло мэ сомэс бэшты чаенца дэ кафэ и пудгия кэ мэ чаёри. Лакэ исыс кайда паше 5–6 бэрш, ятя тэ мангэл ловэ, а мэ камьём тэ ракирав ласа. Ёй бэштя паш мандэ и ятя тэ роспхэнэл, со латэ дад насвало, дай мэя, латэ 5 пшала. Мэ патяндыём лакэ, дыём лакэ ловэ. Чая мангэ потом роспхэндэ, со сарэ чаворэ, кон мангэла ловэ пэ улицы, хохавэна: лэнгирэ дада пьена, и далэ ловэ, кай ёнэ скэдэна, джана лэскэ пэ бравинта. Чаворэ на джана кхэрэ, пока на скэдэна дакицик ловэ, кицик пхэндя лэнгэ дад! Кон на скэдыя дакицик, кицик треби ловэ, кэрэна буты сари рат, а сутэ пэ чар дэ парко.
Исы кэ Македония лачи гилы, ёй сыр ромэнгиро гимно кэ Македония.
Дывэс пашилен, тхайдэса трэ васта,
Мангэса тэ рэсэс, кхамэс тэ долэс,
Джи о чергэня, най ту тэ анэс
Тхай са о рома кэтанэ!
Лулуди лошалел, дживдипэ лумия,
Гилы порани, парамис романи,
Сы ли мангипэ, шай ли тэ пхэнэл
О пхуро чачипэ!
Пхаро сы, прала, амаро дживдипэ,
И лума сы амаро баро кхэр,
Кай гили мэ сар жуанэл
Кэ састы лума, камипэ тэ тхавдэл!
Адая гили роспхэнэл пал пхаро романо джиипэ, со миро сы ваше ромэнгэ баро кхэр, тэ авэл кхам кэ састо миро. Явья рат, а рома всаек газдэна пэскирэ васта и камэн дэ риськирэн кхам. Пхуро чачипэ сы ваш ромэнгэ бут важно.
Тэ авэн сарэ рома дэ дава миро бахталэ и састэ, тэ ракхэл лэн Дэвлоро!