Обратная связь Андо Интернационально рромано дес АДЦ «Мемориало» лашярдя э история ле патрецэнца «Э Алёна» пал рромане глати кай гэле те учинпе. Кадя сы чячи история пай дискриминация анде школа кай аме мишто жянас саворрэ.
Э Алёна, лако пхрал о Шабано ай лакэ вэря э Елза ай о Григараш тиденпе те жян кай школа. Вон траин анде бар э бари кай сы опрал па дуй шэла семестуря. Ле рром ле барэ чи жянен те динен, ай ленгэ глати камен те пхирэн кай школа. Э Алёна камел те кэрдёл учительница, сар э Анна Петровна, кай учисардя ла дэ ката 1 жи ка 4 классо. Э Елза жял анде школа перво дата, вой камел те кэрдёл докторо. Вой ивенде сас кай больница андо раёно, коче анде палата кай бэшэнас ле рромане глати сас ррысо шыл, ай кхоник чи дикхэлас лендар. Атунчи э Елза атярдя кэ кадо сы бари дела кана о докторо дикхэл ле насвале глатен. О Шабано камел те кэрдёл кэтана, кэ во гындил кэ ле кэтани сы май састе мануш.
Кана ле глати гэле кай школа, вон дикхле кэ ле глатен вулавен ле — ле раклоррэ жян кай бари чячи школа, ай ле шяворрэ жян кай цынорры «рромаи» школа. Анде кодя школа э цынорры кай сы рромаи учинпе опрал па кшэл глати. Коче анде школа сы нума дуй комнацы, ай трин гажя кай сытярэн ле цыноррэ глатен сорро дес. Ле глати кай сы май барэ дэтэт чи мекле ле анде бар ла школати.
Ле глатицы э Елза ай о Шабано каменас те жян анде школа э бари. Коче сы лаще барэ комнацы, спортзало, библиотека, э комната кай сы ле кампютэря, э комната кай хан ле глати, э комната кай денпе ле цаля, ай лашярде неве будэри. Но лен чи мекэн ле коче ай траден ле анде цынорры школа кай най тхан касте халавенпе ле васт, най барэ комнацы, най книжки. Са кадала делуря най ле рромане глатенгэ.
Э Алёна май фуго камелас те жял андо 5 класо анде бари школа — вой мишто училаспе анде ле классуря ле цыгне, акана вой трубул те жял анде бари школа кай ка сако уроко сытярэл авер гажё. Ле глати кай кончисарде э школа э рромаи камен те жян анде бари школа, но лен чи мекэн ле ай пхандавен англа ленде ле удара. Ле глатицы ащиле аври, ашунен сар башэл о званоко, ай наштин те жян андрэ анде школа. Ле глати чи камен те жян кхэрэ, кэ жянен кэ сы ле воя те учинпе. Ле глати цыпин ай башавен андо удар ла школако кай сы пхандадо. О директоро ла школако э Зинаида Георгиевна цыпил андай школа: Рромано класо най аме, ай те сытён туме ле раклоррэнца туменгэ най воя, жян туменгэ кхэрэ! Ле глати атярэн кэ акана авен ле кэтани ай лен ле. Мусай те жян кхэрэ!
Кадо дивано чячё ло (нума авер анава): бут рромане глати анде Ррусыя, Украина ай Молдова, Узбекистано ай Таджикистано наштин те пхирэн кай школа. Лен никэрэн ле анде школа э рромаи, ай май англе чи мекэн ле те жян те сытён. Кана пущен катал гаже кай сар э Зинаида Георгиевна сытярэн ле рромане глатен — состар ле рромане глате кай пхирэн ленде кай школа чи кончиин ла, вон пхенен — «ле рром коркорро чи камен те учинпе»
Ка сако глата сы ла воя те пхирэл кай школа. Ле педагогуря трубун те сытярэн саворрэн ек фяло.
Художник – HN, школьник